Liwanag sa Likod ng Pisara: Kwento ng Isang Guro na Hindi Sumuko
ni Myca Janica Mea E. Ariate
“Ang kahirapan ay hindi hadlang upang magtagumpay. Ang tunay na hadlang ay ang pagsuko sa pangarap.”
Sa edad na 76, habang ang karamihan ay pinipiling magpahinga at namnamin ang bunga ng mahabang taon ng pagtatrabaho, may isang babae sa lungsod ng Tanjay City ang patuloy na maagang gumigising upang gampanan ang kanyang tungkulin bilang guro at pinuno. Si Gng. Saturnina Villaflores Siplon, ang kasalukuyang Punong-Guro ng Senior High School Department ng Diaz College, ay patunay na ang edad ay hindi sukatan ng sigla kung ang puso ay nananatiling nakatuon sa paglilingkod.
Lumaki si Gng. Siplon sa isang payak na pamilya. Ang kanyang ina ay nagtitinda ng isda at ang kanyang ama naman ay magsasakang nagtatanim ng tubo sa lupang hindi nila pag-aari. Hindi marangya ang kanilang pamumuhay, ngunit sagana ito sa aral ng sipag at tiyaga. Sa murang edad, natutunan niyang ang kahirapan ay hindi dahilan upang sumuko sa pangarap, kundi hamon upang magsumikap nang higit.
Sa kanyang pag-aaral, kapansin-pansin na ang kanyang dedikasyon. Nagtapos siya bilang Top 3 at First Honorable Mention sa high school, dahilan upang makamit niya ang iskolarship sa Silliman University. Pangarap man niyang maging nars, kinailangan niyang isantabi ito dahil sa kakulangan sa pananalapi. Pinili niya ang kursong edukasyon at naging working scholar upang maitaguyod ang sarili. Hindi naging madali ang pagsabay sa trabaho at pag-aaral, ngunit nanaig ang kanyang determinasyon. Kalaunan, nagtapos siya ng Bachelor of Science in Education, kumuha ng Master of Arts in Education, at tinapos ang iba pang akademikong rekisito, mga patunay ng kanyang walang humpay na paghahangad ng kaalaman.
Sa loob ng mahigit apat na dekada, inialay niya ang kanyang buhay sa pagtuturo. Nagsimula siya bilang guro ng Agham sa isang pribadong paaralan bago lumipat sa East Negros Institute, na ngayo’y kilala bilang Diaz College. Pagkaraan, tinanggap niya ang hamon ng pagtuturo sa Tanjay National High School – OPAO, kung saan hindi lamang siya nagturo ng General Science, Biology, at Chemistry, kundi nagsilbi ring Guidance Counselor at Science Supervisor ng lungsod. Sa bawat papel na kanyang ginampanan, dala niya ang parehong sigasig at malasakit para sa mga mag-aaral.
Noong 2014, muling bumalik si Gng. Siplon sa Diaz College. Sa Senior High School, hinuhubog niya ang kabataan sa mga asignaturang Biology, Disaster Readiness and Risk Reduction, at Earth and Life Science. Sa kolehiyo naman, ibinabahagi niya ang kanyang kaalaman sa Science at Education subjects, pati na rin sa Special Education para sa mga mag-aaral na may kapansanan sa pandinig. Para sa kanya, ang pagtuturo ay hindi lamang paghahatid ng leksyon, kundi paghubog ng karakter at pag-asa.
Sa kabila ng kanyang mga tagumpay sa propesyon, hindi rin naging madali ang kanyang personal na buhay. Nag-asawa siya sa edad na 27 at biniyayaan ng apat na anak na lalaki na pawang nakapagtapos ng kolehiyo. Noong Setyembre 4, 2025, pumanaw ang kanyang asawa dahil sa sakit sa puso. Ang pagkawala ay nagdulot ng matinding dalamhati, ngunit pinili niyang manatiling matatag at ipagpatuloy ang kanyang tungkulin. Sa halip na magpadaig sa lungkot, ginawa niya itong lakas upang higit pang paglingkuran ang institusyong kanyang minamahal.
Noong Agosto 4, 2025, opisyal siyang hinirang bilang Punong-Guro ng Senior High School Department ng Diaz College, isang pagkilalang sumasalamin sa kanyang mahabang taon ng sakripisyo, katapatan, at kahusayan. Bagama’t minsan niyang pinangarap ang ibang landas, natagpuan niya ang tunay na kaganapan sa pagiging guro. Sa bawat estudyanteng nagtatagumpay, sa bawat pasasalamat na kanyang natatanggap, doon niya nasusukat ang tunay na halaga ng kanyang propesyon.
Ang buhay ni Gng. Saturnina Villaflores Siplon ay isang malinaw na paalala na ang tagumpay ay hindi nakabatay sa estado ng buhay, kundi sa tibay ng loob at determinasyong magpatuloy. Mula sa isang batang nangangarap sa Tanjay hanggang sa pagiging haligi ng isang institusyon, ipinakita niyang ang kahirapan ay hindi kailanman magiging hadlang maliban na lamang kung tayo mismo ang susuko.
